Fere Feer,(insidesomalia.org)- Xoogagga Makamadaha Islaamiga ayaa saaka waxaa ay weerar u qaadeen kolonyo Ciidamo Itoobiyaan ah oo ku sii jeeday dhinaca Degmada Feer-feer xilli ay marayeen halka lagu magacaabo Baar kuul oo ah tuulo u dhaxeysa Kalabeyr iyo Degmada Feer-feer.

Ciidamada Itoobiyaanka ayaa la sheegay oo ku hubeysnaa ilaa 8 Gadiidka dagaalka  ayeey wararku sheegayan in muddo ku dhan hal saac dagaal culus la galeen Xoogagga Maxkamadaha, lakiin ilaa hada ma 'jiraan warar faah faahsan oo ka hadlaya khasaaraha Dagaalka Saaka dhacay, waxaana warku intaa ku darayaa in Ciidamada Itoobiyaanku dhaafeen goobtii uu dagaaku ku qabsaday.

Dagaalka saaka ka dhacay halka lagu magacaabo Baar Kuulow ayaanan filaneyn Ciidamada Itoobiyaaku, maadaama goobta lagu dagaalamay ay wax xoogaa u jirto Degmada Feer-feer ee dhulka Ismaamulka Soomaalida Itoobiya.

Cabdiraxiin Ciise Caddow oo u hadlay Xoogagga Makamadaha Islaamiga ayaa sheegay in dagaalka saaka dhaxmaray Ciidamada Makamadaha Islaamiga iyo kuwa Itoobiya ku gubeen labo ka tirsan Gadiidkii ay wateen Ciidamada Itoobiya, isaga oo intaa ku daray  suurta galnimada in qaar ka mid ah Ciidamada Itoobiyaanku ku dhinteen Dagaalka.

Maalmihii aynu soo dhaafnay qeybo ka mid ah Goballada dhaxe ee dalka Soomaaliya waxaa ka jiray dagaalo u dhaxeeya Ciiidamada Itoobiya iyo Xoogagga Maxkamadaha inkastoo ugu danbeytii Ciidamada Itoobiyaanku soo gareen Xerada Jate-kuundisho oo ah saldhiga rasmiga ah ee Itoobiyaanku ku lee yihiin Gobalada dhaxe.